ណុប មាន រំជួលចិត្តត្បិតក្លាយជាមនុស្សទី៥លានដែលទទួលវ៉ាក់សាំងហើយបានប្រាក់ ១០លានរៀលសម្តេចតេជោ ហ៊ុន សែន
ភ្នំពេញ: នៅថ្ងៃពុធ ទី១៤ ខែកក្កដា ឆ្នាំ២០២១នេះ ថវិកាឧបត្ថម្ភលើកទឹកចិត្តចំនួន១០លានរៀលរបស់នាយករដ្ឋមន្ត្រីកម្ពុជាសម្តេចតេជោ ហ៊ុន សែន បានធ្វើឱ្យបុគ្គលទី៥លាន ដែលទទួលបានការចាក់វ៉ាក់សាំងរំជួលចិត្ត ទប់ទឹកភ្នែកពុំបាន ខណៈលោកណុប មាន បានទាំងការចាក់វ៉ាក់សាំងការពារអាយុជីវីតនិងបានទាំងថវិកាលើកទឹកចិត្ត។
ថ្លែងទៅកាន់អ្នកសារព័ត៌មាន លោកណុប មាន បាននិយាយទាំងអួលដើមករមិននឹកស្មានថាមានភ័ព្វសំណាងបានប្រាក់លើកទឹកចិត្តដ៏ច្រើនសន្ធឹកសន្ធាប់ពីសម្តេចតេជោនាយករដ្ឋមន្ត្រីនាពេលនេះ។
"ថវិកានេះនឹងជួយដោះស្រាយការលំបាករបស់រូបខ្ញុំដែលកំពុងខ្វះខាតផងនោះ" លោកណុប មាន បាននិយាយទៅកាន់អ្នកសារព័ត៌មាន ហើយថែមបានចាត់ទុកថវិកានេះប្រៀបដូចជាថវិកាព្រះប្រទានដែលនឹកស្មានមិនដល់។
អំណោយដែលនាំទៅជូនទៅ លោកណុប មាន អាយុ ៧០ឆ្នាំ ដែលជាកសិកររស់នៅភូមិសែនសំ ឃុំអូរស្វាយ ស្រុកត្រពាំងប្រាសាទ ខេត្តឧត្តរមានជ័យរូបនេះ ក្រៅតែពីថវិកា១០លានរៀលទៅ ក៏មានការផ្តល់ជំនួយជាស្បៀងអាហារមានអង្ករ ទឹកត្រី ទឹកស៊ីអ៉ីវ និងត្រីខកំប៉ុងជាដើម៕
